برنامجنا أيه فى رمضان ؟؟

السلام عليكم ورحمة الله و بركاته

اللهم بارك لنا فى شعبان و بلغنا رمضان

يا ترى ايه برنامج كل واحد فينا فى رمضان؟

طبعا مهو رمضان فرصه واى فرصه لازم نغتنمها و مش هينفع نغتنمها صح لو كانت من غير تخطيط و ماشيه بشكل عشوائى

اليوم هيجر يوم و فجأه خنلاقى رمضان خلص من غير ما نعمل فيه حاجات كتير كان نفسنا نعملها

يبقى ايه الحل؟

الحل اننا من دلوقتى بالورقه و القلم نخطط لبرنامجنا فى رمضان .. و كل واحد على قد مقدرته .. و كل واحد و أبداعاته

أنا هبدأ معاكم و أفكر بصوت عالى

و يا ريت كلنا نساعد بعض و نضيف و نعدل لحد ما نوصل لخطه جميله نرضى بيها رب العالمين

و كل واحده فينا تختار منها اللى يناسبها و اللى تميل ليه أكتر

تعالوا قبل ما نبدأ ناخد نيه أننا نساعد بعض و نفتح أفكار و ابواب للخير لبعض .. و نقتدى بحديث الرسول عليه الصلاة و السلام "من سن سنة حسنه ..."

بسم الله نبدأ:

- الصلاه لوقتها و يا حبذا لو فى أول الوقت

- الصيام أيمانا و أحتسابا . و معنى ايمانا و احتسابا زى ما انا فاهماه و على قد علمى المتواضع جدا هو الصيام لله سبحانه و تعالى ايمانا به سبحانه و اتباعا لأوامره و طاعته. أحتسابا: اى احتساب أجر الصيام على الله سبحانه و تعالى 

- قرأه أيه الكرسى دبر كل صلاه مفروضه مصداقا لحديث الرسول الكريم صلوات الله عليه و سلامه . بما معناه: ان الذى يقرأ أيه الكرسى دبر كل صلاه لا يمنعه من دخول الجنه الا الموت

شوفتوا حاجه بسيطه و صغيره قد ايه بس ثوابها ان شاء الله عظيم تعالوا نوطن انفسنا على فعلها حتى تجرى منا مجرى الدم فى العروق بعون الله

- ختم الصلاه 33 مره سبحان الله و 33 مره الحمد لله و 33 مره الله أكبر و مره لا اله الا الله

- صلاه السنه : 2 قبل الفجر - أجرهم عظيم جدا بأذن الله خصوصا اللى قبل الفجر - 2 قبل الظهر و 4 بعده او العكس - 2 بعد المغرب و 2 بعد العشاء

- الشفع و الوتر او حتى ركعة وتر واحده و لكن داوم عليها فأحب الأعمال الى الله ادومها و ان قلت

- الترديد مع الأذان و ترديد : "اللهم رب هذه الدعوة التامه و الصلاه القائمه . أتى سيدنا محمدا الوسيلة و الفضيله و ابعثه اللهم مقاما محمودا الذى وعدته أنك لا تخلف الميعاد. رضيت بالله ربا و بالأسلام دينا و بسيدنا محمد نبيا ورسولا" بعد الأذان مباشرة

- أذكار الصباح و المساء 

- الدعاء فى الأوقات المستحب فيها الدعاء مثل بين الأذان و الأقامه - قبل أذان الفجر - عند الفطر

و نركز اوى بقى على الدعاء وقت الأفطار. و كان الصحابه رضوان الله عليهم يجهزون قائمه بالدعوات التى سوف يدعونها و يركزون على 4 او 5 منهم مثلا و يظلوا يرددونها طوال الشهر الكريم . و لا يأتى عليهم رمضان التالى الا و قد أجيبت دعواهم

اللهم امين يا رب

تعالوا من دلوقتى كل واحده فينا تجهز لسته بالدعوات و تركز على كام واحده و تكتبهم و تعلقهم فى مكان تشوفوا اغلب الوقت علشان تفضل فاكراهم علطول خصوصا ساعة الفطار

- قراءة القرأن

الله الله . من أحلى ما فى رمضان تلاوة القرأن و العيش به و معه

خلى التلفزيون مفتوح أغلب الوقت حتى و انتى بتشتغلى فى البيت على قناه قرأن كريم 

و شوفى بقى من دلوقتى ناويه على كام خاتمه فى رمضان

واحده و لا أتنين و لا تلاته و لا كام؟

- صلاة التراويح و هى سنه

- صلاة القيام فى جوف الليل و لو ركعتين يبيض بهم الله وجوهنا 

و فى حديث قرأته و لكنى لا اتذكر نصه يقول بما معناه أن انضر الناس وجوها و اجملهم هم الذين يقومون الليل . يلا كلنا عاوزين نبقى حلوين مش كده

- ذكر الله

نجعل دائما لساننا عطرا بذكر الله . حتى و احنا بنطبخ او بنظف او فى المواصلات او بنسوق و علشان مننساش نكتب برده ده على ورقه بخط كبير و نحطها فى مكان ظاهر لينا اغلب الوقت

على باب التلاجه مثلا او على تابلوه العربيه او على شاشه الكمبيوتر

- صله الرحم و لو بتليفون و مباركه فى اول رمضان هتفرح الناس و تحسسهم انك فكراهم

- الصدقه فى رمضان فقد كان رسول الله فى رمضان أجود من الريح المرسله

و معنى المرسله هى المستمره التى لا تنقطع

الصدقه بأى شىء و لو كانت بسيطه و لو كانت بسمه فى وجه اخيك المسلم . المهم النيه

- أفطار الصائم

و لو على شربه ماء او تمره علطول يتحسب يوم صيام لينا 

من اجمل الحاجاه و الله افطار الصائمين فى رمضان. ممكن لو انتى بتشتغلى او أتزنقتى فى المواصلات يوم لحد ما أذان المغرب خلى معاكى شوية تمرات وزعيهم على الناس اللى فى الشارع او اللى فى العربيه معاكى او حتى زجاجة ماء و كوبايه او علبة عصير 

اى حاجه المهم تستغلى الفرصه

و نفس الموضوع ينطبق على شنط رمضان التى توزع على المحتاجين و بيستخدموها طوال الشهر الكريم

- زياره الأيتام او المسنين و الأفطار معم خصوصا المسنين بيفرق معاهم اوى و بيبقوا فرحانين جدا 

العشرة الأواخر

ودول لوحدهم محتاجين خطه

---------------

بالنسبه بقى لختم القرأن 

- خاتمه فى التراويح - جزء كل يوم

- خاتمه قراءه - كل يوم جزء

- خاتمه قيام ليل - كل يوم جزء

- خاتمه خاصه للعشر الأواخر كل يوم 3 أجزاء

طبعا ممكن مثلا نخلط من ده على ده يعنى مثلا خاتمه القراءه نواصل بيها فى صلاه التهجد و نبدأ واحده جديده بعد ما ديه تخلص

لكن مثلا نخلى خاتمه التراويح قائمه بذاتها علشان نضمن اننا ختمنا القرأن و لو مره واحده واحنا واقفين على رجلينا فى صلاه لله تعالى

ممكن فكره تانيه و هى خاتمه بتدير . يعنى ايه؟ يعنى أقرأ الأيه و تفسيرها علشان أفهمها كويس. وديه طبعا بتاخد وقت أكبر بس ثوابها بردوا اكبر بأذن الله

-----------------

ديه الأفكار اللى عندى لحد دلوقتى يللا شاركونى و قولولى رأيكم و أفكاركم انتم كمان

مستنياكم

و متنسوش

رمضاااااااان كريم ............ و الله أكرم

بحبكم فى الله