عزيزتى الأم زى ما بتبنى فى اولادك و فى زوجك و بتحبى تشوفيهم متقدمين و فى احسن صوره .. هم أكيد كمان يحبوا يشوفوكى كده 
و كمان علشان تبقى قدوه لأولادك .. هتخليهم أزاى يبنوا فى نفسهم و هم شايفينك قدامهم محلك سر ؟
علشان أحترامك فى قلوبهم يفضل و يزيد .. علشان لما يكبروا ما يقولوش دى ماما ست طيبه و على قدها 
انا عن نفسى محبش يتقال عنى كده .. و اللفظ ده غالبا بيتقال عن الشخص اللى بطل يطور فى نفسه و قدراته و نسى نفسه فى زحمه الحياه
أتعلمى حاجه جديده .. حاجه ايه لأ أتعلمى حاجاااااااااااااات جديده
خلى عندك برنامج و لسته اهداف تمشى عليها و تحققيها
هتتحججى بالوقت .. صدقينى مش فى صالحك .. أخلقى لنفسك وقت و أشمعنى لاقيه وقت لحاجات تانيه
يا معشر الأمهات أحنا كلنا نفسنا نبقى مهمين لأولادنا و أجوازنا و نفسنا انهم يقدرونا و يحترمونا لشخوصنا مش بس للخدمات اللى بنأديهالهم فأقل شىء أننا نبقى محترمين فى عيون أنفسنا
كل واحده فينا حاسه انها مقصره و أنها ينقصها المهاره و ان خلاص بقى راحت على .. ما انا اصلى سبت كل اللى اتعلمته و اللى ممكن اتعلمه علشان بينتى و اولادى .. فى الأخر بنحس أدام نفسنا اننا و لا حاجه
و لما كل واحده فينا بتقعد مع نفسها بتقول ايه اللى بتقنه و بعمله و تبدأ تشوف نفسها بشكل للأسف مزرى و بالتالى ثقتها فى نفسها بتنزل و طبعا أحساسها بالأنجاز فى حياتها بيبقى صفر
لأ أستوب
طورى فى نفسك أستثمرى فى عقلك
كل يوم ضيفى لنفسك حاجه جديده مفيده
شوفى طريقه متحطيش أيدك على خدك و تقولى الظروف .. انتى عملتى ايه علشان تقهرى الظروف
ألعبى رياضه .. اتعلمى سواقه.. نمى هوايه عندك .. اتعلمى لغه .. دورى على شغل حتى لو كان من البيت .. أقرى فى موضوع معين و فيدى بيه الناس
فكرى أكيد فى حاجات ممكن تعمليها و تتعلميها
حتى لو هتقرى و بس جيبى كتب من المكتبات و أقرى
لازم تستثمرى فى عقلك و فى صحتك
لو عملتى الخطوه ديه حتى لو كانت بشىء بسيط كل يوم أحساسك بنفسك و بقدراتك و انك ماسكه زمام أمورك و حياتك هيزيد و هتفرحى اوى و مش هتبطلى تانى
بحبكم فى الله
No comments:
Post a Comment