السلام عليكم ورحمة الله و بركاته يا أحلى أمهات
أنا كنت بطبعى عصبيه أوى مش علطول لكن لما بيحصل موقف يعصبنى بوصل لأخرى. كان ممكن اوى لما أتعصب أرمى اى حاجه أدامى فى الأرض أو أحدف اى حاجه فى الحيطه مثلا.
**************
بعد ما ولدت و بنتى كبرت شويه يعنى بقت تعى لقيتها لما تتنرفز بتعمل زى .. أتخضيت جدا . أنا رافضه تماما أنها تعمل كده . و ساعتها شوفت حقيقه اللى بعمله و حسيت أد ايه هو شىء وحش اوى و مكروه و قررت أنى مش ممكن اعمل كده تانى علشان خاطر بنتى معنديش أستعداد أربيها كده و أتحمل ذنب أنها بقيت كده.
و ساعتها أكتشفت ان وجود بنتى فى حياتى ربانى وخلانى أحسن 
**************
كتير مننا كان بيسمع أغانى و كتير ما زال
انا الحقيقه كنت بسمع الأغانى بالصدفه يعنى لما تيجى فى التلفزيون ممكن أسمعها مفيش مشكله و ممكن اتفرج على الفيديو كليب عادى (زمان مكنتش الفيديو كليبات فظيعه زى دلوقتى - انا دلوقتى اتكسف حتى ابص عليها)
طبعا كان بيبقى فيه رقص و ملابس خليعه و انا كنت بربى بنتى على ان ده حرام و لما تشوف واحده لابسه كده يبقى ده غلط هى بتعمل حاجه حرام و بعلمها غض البصر . لو جيه منظر فى بنت مش لابسه كويس منبصش حرام . كانت صغيره اوى 3 سنين مثلا او اقل و كانت بتسمع كلامى
و مره بقلب فى التلفزيون كان فيه فيديو كليب جديد و كنت هموت و أشوفه و بنتى كانت واقفه جانبى و بصالى بتشوفنى هعمل ايه.
يا ترى هقلب ولا هتفرج ؟؟؟؟؟؟
فى اللحظه ديه قررت انى مش ممكن هأمرها بحاجه و اعمل انا عكسها مهما حصل. ثقتها اللى هتهتز في. و صورتى اللى هتتشوه فى عنيها اغلى عندى كتير من التافهات ديه
و من ساعتها و انا لا بشوف كليبات و لا بسمع اغانى نهائى
ممكن فى حنه و لا فرح نشغل اغانى افراح و خلاص
و أكيد فى حاجات تانيه كتييير بس ده اللى فكراه دلوقتى
و أكيد برده مننا كتير حصلهم زى ما حصلى
**************
و علشان كده وزى ما بنطالب اولادنا انهم يشكرونا على تربيتنا ليهم و يمتنوا لينا متهيألى المفروض أحنا كمان نشكرهم على التربيه اللى حصلنا عليها بسبب و جودهم فى حياتنا
**************
شكرا ليكى يا بنتى بجد وجودك فى حياتى خلانى أنسانه أفضل
No comments:
Post a Comment