بسم الله الرحمن الرحيم
لكل الأمهات اللى تابعوا معانا موضوع الإنجاز فى حياة المرأه الأم, حبيت أبدأ موضوع جديد نهتم فيه بالتطبيق أكتر من الكلام
الموضوع مفتوح لكل واحده فينا تضيف عليه براحتها و تقترح و نتناقش و نعدل علشان نوصل للأفضل ان شاء الله.
أقترح ان فكرة الجزء ده زى ما واضح من العنوان هو عمل جدول يومى, كل واحده فينا تعمله لنفسها و يبقى عندها دايرى خاص بيها تعمل فيه جدولها اللى هيحتوى على الأعمال اللمهم اللى تعملها كل يوم و تحسسها بالإنجاز و ترفع من مستوى أحترامها لذاتها وثقتها فى نفسها وقدراتها و أهم حاجه تفرحها.
لأن كتير مننا فى زحمة اليوم بينسى يعمل حاجات مهمه بالنسبه له, و لما يحط رأسه على المخده و ينام ساعتها بيحس انه مش سعيد و متضايق و حاسس أن يومه ضاع على الفاضى و معملش فيه اللى هو عاوزه فبيجيلوا أحباط و بيتدنى تقديره و أحترامه لذاته و بيكون صوره سلبيه عن نفسه و بينام زعلان و يقوم زعلان.
علشان كده الجدول ده كأنه منبه بينبهك كل يوم للحاجات المهمه اللى المفروض تعمليها و فى نهاية اليوم هتعلمى على اللى عملتيه ب صح و تحطى شرطه أمام اللى مقدرتيش تعمليه و تدى لنفسك درجه, و هتعرفى ايه اللى بيستنفذ وقتك و ايه اللى انتى المفروض تركزى فيه و ايه اللى مش مدياله حقه مع انه مهم.
لو عملتى الجدول ده وبدأتى تلتزمى بيه, مع الوقت أحساسك بنفسك و بقدراتك هيتحسن كتير و هتقدرى تنجزى أكتر من الأول .. أوعدك 
لو أتفقنا كلنا و الموضوع عجبكم و تابعنا مع بعض هنحمس بعض زياده و هنستمر ان شاء الله و كمان هيطلع مننا أفكار أحسن لأن عقول كتير بتفكر مع بعضها أكيد أفضل من عقل واحد بيفكر لوحده.
دلوقتى أسيبكم مع الجدول و بنوده
----------------------------------------------------------------------------------------------
طبعا بنود الجدول قابله للتعديل و الزياده و النقصان كلا حسب أحتياجاته و اهتماماته.
وديه صوره للجدول المقترح
----------------------------------------------------------------------------------------------
طبعا أول 3 بنود مش محتاجين شرح
- أنتظام الصلاه : مهمه جدا طبعا علشان الواحد متخدهوش زحمة الدنيا و يتلهى بيها عن صلاته و لو صلاة واحده فاتتك مش فى ميعادها حتى لو الفجر يبقى تدى لنفسك زيرو فى البند ده 
- نافله: عمل اى نافله تحبيها اليوم ده مثلا قرأه قرأن - صلاة سنه - قيام ليل - صدقه - و أبواب الخير كتيره و ملهاش حصر و لله الحمد
- أحتساب : و النقطه ديه اتكلمنا عنها بأستفاضه فى الجزء الأول (يا ريت ترجعيلها بالتفصيل هناك ) لكن بإختصار هو أستحضار النيه فى جميع العمال اللى بتقومى بيها من اول التنظيف و الطبيخ لحد الأبتسامه فى وجه الزوج و اللعب مع الأولاد و الصبر عليه . القعاد على النت و الترفيه مع الأصحاب او أفادة الغير .....
- أهتمام بالنفس : لازم تعملى كل يوم اى حاجه لنفسك زى مثلا ماسك للبشره - حمام كريم للشعر - مكياج حلو - أهتمام بالقدمين و اى حاجه جسمك و أناقتك وشياكتك كانثى محتاج لها .
- رياضه : أيوه رياضه حتى لو مش عاوزه تخسى لازم تلعبى رياضه و لو تمارين بسيطه تديكى أحساس بالنشاط و الفرحه و تخليكى تحسى بجسمك أقوى و أنشط و بالتالى بتعلى أحساسك بالثقه فى الذات و القدره.
- تواصل مع الأبناء : أى نوع من انواع التواصل الحميم بينك و بين اولادك زى مثلا تقعدوا تتكلموا مع بعض, تلعبوا سوا, تحضنيهم و تقوليلهم بحبكم, ......
- تواصل مع الزوج : زى الأبناء و أشمنا هو يعنى, بس طبعا المجال مفتوح لأى نوع من انواع التواصل اللى تشوفى انها مناسبه
- مذاكرة الأبناء : طبعا ده بند مهم لأى واحده فينا عندها أولاد فى المدرسه, و مش معنى البند ده انك لازم تقعدى تذاكرى معاهم لا ابدا. لو انتى متعوده تتابعيهم من بعيد لبعيد و تطمنى على احوالهم فى المدرسه تشوفى كراستهم تسأليهم أخدوا ايه النهارده يبقى كافى جدا.
- face book : بالنسبه لى لازم ابص عليه كل يوم , طبعا ده ممكن يتشال او يضاف غيره زى ما تحبى حسب راحتك.
- lee4u.com : طبعا ده أساسى كل يوم لازم تيجوا تمضوا فى المنتدى
طبعا اللى فاتت ديه مجرد أقتراحات ممكن تضيفى ليها حاجات تانيه زى مثلا: قرأه - تعلم ... - لو بتشتغلى يبقى العمل فى المشروع الفلانى .....
كل ما تعملى بند تعلمى امامه علامة صح و تدى لنفسك درجه واحده و فى أخر اليوم أحسبى عدد درجاتك
و مش هقولك كافأى نفسك بحاجه كل ما تجيبى درجه حلوه لكن انتى نفسك هتحسى ان احساسك انك أنجزتى و يومك مضعش هدر وفرحتك فى اخر اليوم و انتى بتعلمى صح على الحاجات اللى أنجزتيها هتبقى أحلى مكافأه ليكى
منتظره مشاركتكم و أقتراحاتكم و أرائكم و تعديلاتكم
No comments:
Post a Comment