Monday, January 3, 2011

هل أبنك يغض بصره ؟؟!!!



السلام عليكم ورحمة الله و بركاته

سؤال يمكن كتير يستغربوه بالذات لو كان الكلام عن أطفال صغيرين !! 

كلنا شايفين الدنيا بقت عامله أزاى حوالينا فى التلفزيون و فى الشارع و على الأنترنت
و أكتر حاجه من التلاته دول بتأثر فى أطفالنا أو أغلب أطفالنا التلفزيون
و كلكم عارفين التلفزيون بيعرض أفلام شكلها ايه .. أغانى شكلها ايه .. أعلانات شكلها ايه

أنتى بتسيبى أبنك يتفرج لحد فين ؟؟؟
و أسمحيلى أحم أحم و بصوت واطى خاااالص علشان محدش يسمع .. أنتى و باباها بتتفرجوا لحد فين؟؟؟؟؟؟؟؟

فى أم لولد فى اعدادى و بنت فى ابتدائى كنت بتناقش معاها فى الموضوع ده .. و جاءت سيرة الأفلام و التلفزيون و عرفت منها انها بتسيب اولادها يتفرجوا عادى على الحاجات ديه !!! و لما سألتها لحد فين؟ قالتلى يعنى القبلات و الأحضان ديه حاجه عاديه أحنا عدينا المرحله ديه خلاص !!!!!!!

و لما لقيتنى مستغربه و مستنكره اللى بتقوله - و على فكره هى تربويه - قالتلى مهو الممنوع مرغوب - الشماعه الأزليه اللى بنعلق عليها سورى فشلنا - و يعملوه قدامى أحسن ما يعملوه من ورايا و كلمتنى كتير على ان البنى ادم لما يتشبع بالحاجه مع الوقت بتفقد تأثيرها عليها ......
و للأسف التفكير ده تفكير ناس كتير ..
او ناس تانيه مش فى دماغهم و مش شايفين ان فى حاجه غلط بتحصل من الأساس و يقولوا ايه يعنى ما احنا أتربينا كده و بقينا زى الفل أهوه .. و بعدين يعنى هو ده اللى هيبوظ أخلاق الولد او البنت و هيأثر فيه .. انتى مكبره الموضوع اوى .. أنتى معقده

بصراحه كلام غير منطقى و غير مقنع و الأهم ضد أساسيات الدين

هم الصحابه رضوان الله عليهم كانوا بيتشبعوا من الحاجات الغلط علشان يفقدوا تأثيرها عليهم ؟؟؟
أستغفر الله العظيم كانوا أطهار أخيار يزينهم الحياء من الله

و مين قال اننا لازم نخلى الولد او البنت متبلد الأحساس و ميأثرش فيه لو شاف واحده عريانه مثلا أيه التهريج ده ...

طيب مهو الولد اللى أتربى على انه عادى لما يبص هو ده اللى هيكبر يبص على البنات فى الشارع و ممكن يتفرج على مواقع و حشه و يعاكس ديه و ديه 
و البنت اللى شافت و كبرت و تحركت جواها الأنوثه و عايزه حبيب تطبق معاه اللى شافته

مصيبه ايه ديه يا ربى

و ليه انا أطلع ابنى او بنتى يستحل الحرام و يعمله عادى و مش حاسس انه بيعمل حاجه غلط؟ ليه أطلع أولادى متعودين على المعصيه او على وجودها و انها أصبحت العادى فى حياتنا و ميبقاش فيه أستنكار ليها فى قلوبهم

أطفال بريئه فى عمر البرائه عندها أحاسيس ليه ألوثها بأرف و أنحلال و فساد بدل ما أعلو و أسمو بالأحاسيس الرقيقه ديه 

بنات و أولاد على أعتاب المراهقه و مرحلة البلوغ و عندهم عاطفه قويه و فطره ربنا خلقهم عليها .. ليه أرهق عواطفهم ليه ألهب أحاسيسهم . ليه أديهم ماده خام و تصور و غالبا خاطىء يقتاتوا عليه

و هل هو ده السلوك القويم و المناسب لجيل بنقول عليه جيل النهضه و حامل الرايه و فاتح بيت المقدس؟

أيه المنفعه من وراء كده .. أيه اللى هيعود عليهم من كده

حرااااااااام
ده كلكم راعى و كلكم مسئول عن رعيته .. ليه نضيعهم .. 



الحل ايه؟


نمنع التلفزيون خالص و منتفرجش عليه؟
من رأى لأ مش هو ده الحل .. لأنه بعد كده لما يكبر هيفتح التلفزيون و يشوف بنفسه

طيب أعمل ايه؟

الحل من وجهة نظرى هو الأتى:
- تعلميه يعنى ايه غض البصر
مش كبيره اوى ديه عليه .. ده لسه صغير؟
لأ مش كبيره عليه و لا حاجه .. أطمنى هيفهم. حتى لو مفهمش كل كلامك ميه فى الميه هيفهم جزء و مع التكرار منك فى مواقف مختلفه و مراحل مختلفه من عمره هيفهم و هتوصله الصوره كامله

- أنتى و باباها لازم تغضوا بصركم انتم كمان .. مينفعش تبقى بتقوليله كده حرام و انتى بتبصى .. ديه بنت وحشه او ولد وحش و انتى قاعده متابعه مش قادره ترفعى عنيكى ..
ببساطه خليكى قدوه ليه . هيعمل زيك

- خليه متعلق بربنا فى الموضوع ده . متقوليلوش متعملش كده علشان غلط و بس لأ علشان حرام وربنا أعطانا نعمه من عنده هم العينان أزاى نستخدمهم فى معصيه و كل الكلام و الأفكار اللى تقدرى تقوليها فى الموضوع ده
النقطه ديه مهمه اوى علشان لو مركزتيش عليها . هو هيغض بصره طول ما انتى معاه و بس و اول ما يبقى لوحده هيبص
بكرر تانى مع الوقت و تكرار الأمر عليه بطرق مختلفه و كلمات و تعبيرات مختلفه و بيان فضل حاجه زى كده و هتعود عليه بالنفع أزاى و بيان حرمانياتها و أضرارها مش هيعمل كده من نفسه حتى لو كان قاعد لوحده قدام التلفزيون

- راقبيه و أختبريه
أيوه قومى و سيبيه قدام التلفزيون و تابعى من غير ما يبقى عارف انك شايفاه و شوفى هيعمل ايه
لو لقتيه لسه بيبص يبقى زودى الجرعه. لو أستمر يبقى فجأيه و أزعلى منه بحب وشفقه و لما يبقى مكسوف منك انه عمل كده قوليله أولى تتكسف من ربنا اللى شايفك و عارف بتفكر فى ايه طول الوقت
ركزى طول الوقت على معية الله بكلام غير مباشر و فى بعض الأحيان مباشر 
أتكلمى معاه و متقوليش مش هيفهم صدقينى بيفهم حتى لو معرفش يعبر .. بيحس بتوصله خصوصا لو بتتكلمى بصدق و من القلب

- عموما زودى الجانب الدينى فى حياته متمثل فى عبادات صدقات سماع برامج دينيه و لى موضوع منفصل عن هذا الأمر ان شاء الله

- لو مكنتيش انتى بتغضى بصرك و بتتفرجى على الحاجات ديه راجعى نفسك كويس و أعرفى ان الصغائر ساعات بتتكالب على الأنسان حتى تهلكه و متنسيش ان النظره سهم مسموم من سهام ابليس يرشق فى القلب فيدميه و يسلبه طهره و نقاءه

- لو قاعدين كلكم بتتفرجوا على حاجه و جاء منظر مش و لا بد بين أتنين مثلا أقلبى قبل حتى ما المنظر يبتدى اول ما تشكى ان فيه حاجه . هو هيفهم انتى قلبتى ليه و لو سألك قلبتى ليه يا ماما ؟ قوليلوا علشان فى حاجات وحشه حرام نشوفها
قوليلوا مش عايزه عنيك الحلوه الجميله ديه تتلوث بأى حاجه وحشه او حرام
لو جاء منظر مثلا فيه واحده لابسه قصير او مش حشمه عموما بس لدرجه معقوله أشيحى بوجهك و شوفيه هو كمان هيعمل زيك و لا لأ و لو معملش زيك أمسكى انتى دقنه برفق و خليه يحول وشه .. مع الوقت هيتعود
أبدأى معاه من وهو صغير علشان الموضوع يبقى سهل عليه و علشان تربى فى قلبه أنكار لحاجه زى كده من قبل ما يألفها و يتعود عليها و يبقى محتاج مجاهده أكبر انه يقلع عنها

- و أخيرا أدعى ربنا يحرسه و يقويكى على تربيته و يتقبله منك عاملا خالصا لوجهه الكريم

طولت عليكم انا عارفه بس الموضوع ده اعتقد انه مهم اوى لأنه سبب بلاوى كتير فى حياتنا 

منتظره مناقشتكم و أفكاركم وارائكم حول الموضوع و أكمل حديثى معكم ان شاء الله

عن ما يراه فى الشارع و على الأنترنت و كلام الأصدقاء

6 comments:

إيمان سالم said...

جزاكى الله كل خير ماشاء الله عليكى كلامك كله صح

وانا لسة كنت بتكلم فيه مع زوجى اول امبارح فى ان الولد مش لازم عنيه تتعود ماتشوفش الا كل شئ محترم علشات تعرف بعد كدة تستنكر العيب والحرام

بارك الله فيكِ .. وأثابك

amar_alam2000 said...

جزاكي الله خيرًا يا قرة العين
وهذا فعلا مرض خطير وداء وبيل أتمني من الآباء والأمهات التنبه له
أقول هذا وأنا أستاذ تربوي لعلي أري أكثر مما يراه الأباء فقد رأيت أطفالا لا تتجاوز أعمارهم الثامنة يتكلمون عن حبهم لفلانة وعلانة
وما ذلك إلا لما يروه في الأفلام والمسلسلات وتربيتهم على ذلك
أتمنى فعلا مراقبة نظر الولد لأنه يخزن ثم يخرج لا شعوريا

نهضه said...

جزاكم الله خيرا و أعاننا على حسن تربيه اولادنا و بناتنا على الطهر و العفاف و الفطره السليمه التى فطر الله الخلق عليها
مع تحياتى

cute said...

انا معاكى وجزاكى الله خيرا موضوع رائع

نهضه said...

جزانا واياكى يا كيوت ربنا يعزك يارب

ستتذكرني ! said...

جزاكي الله خير
انا فخوره فيكي ، فعلا امه محمد عظيمه

الله يرزقكي على قد نيتكي