Monday, November 29, 2010

الأنجاز فى حياة المرأه الأم 6

طيب كنت عايزه قبل ما نكمل فى موضوعنا و أتمنى انكم تشاركونى اننا نعمل ملخص فى نقاط للحاجات اللى قلناه و اللى هتزود احساسنا بالأنجاز و تعدل الصوره السلبيه اللى وخدنها عن نفسنا
و هبدأ:

- الأحتساب فى كل ما تفعله من اول اليوم لأخره
- أصلاح علاقتك مع ربنا لأن هى ديه غاية وجودك و علشان تنسجم مع الكون كله
- متركزش على جانب واحد فقط فى حياتك أولادك زوجك . .. لأ لازم يبقى فى حياتك جوانب متعدده
- أبنى فى نفسك . ده مهم اوى خلى عندك برنامج شخصى لتطوير نفسك حتى لو بخطوات صغيره لكن لازم يكون موجود
- أشترك فى اى نشاط خيرى او تطوعى لوحدك مع اصحابك او فى جمعيه خيريه و ساعتها هتدرك اشياء فى حياتك ما كان لك ان تدركها الا بهذا العمل .. هتثرى حياتك و تجاربك
- دلع نفسك
أعمل اللى بتحبه و يخليك مرتاح مادام حلال و مفيهوش انقاص من حق حد
- أنظر للأمور من وجهة نظر مختلفه . متبصش من خرم واحد و الباب قدامك مفتوح


الأنجاز فى حياة المرأه الأم 5

أمهات لى (www.lee4u.com/vb) الغاليين حبايب قلبى و بما ان اغلب اللى اتكلموا فى الموضوع لحد دلوقتى امهات متفرغات هنركز بقى مع بعضينا فى المواضيع اللى تخصهم الى ان يظهر حد من الناس التانين هههههه
هل الأحساس بالأنجاز يأتى فقط عندما تعمل عمل تحبه ام انه من الممكن ان يأتى بعد القيام بعمل لا تحبه؟


اللى جاوبه قالوا مع العمل اللى بحبه فقط
بس انا لى وجهة نظر مختلفه بعد أذنكم
فى ناس بتاخد الموضوع كتحدى و انها لما تخلص عمل لا تحبه ببراعه و اتقان ده انجاز فى حد ذاته لأنه قدر يتغلب على نفسه و رغباته و بالتالى هو حاسس انه اقوى 
فاهمين قصدى؟
يعنى بياخد الموضوع كتحدى لنفسه و أثبات لقدرته على السيطره عليها و التحكم فيها و ده بيبقى أنجازه الشخصى



ساعات برده بيبقى الشغل اللى المفروض تعمله مهم فعلا ليك و هيفرق معاك بس انت مش حابه و بتغصب نفسك بالعافيه انك تعمله و بعد ما تخلصه تكتشف فعلا انه كان انجاز و تفرح بيه



الفرق بين الحاله الأولى و التانيه هى ان الأولى بتبقى مستمتعه و هى بتعمل كده لأنها مركزه على نفسها مش على الشغل اللى بتكرهه و الحاله التانيه بتعمل الشغل برده بس بضجر و سأم ورغبه فى انهائه فى اسرع وقت
يعنى الحاله الأولى بتبقى راضيه و مبسوطه طول الطريق و عند الأنتهاء
لكن التانيه عند الأنتهاء فقط



فى كمان ناس لما بتشتغل حاجه مش بتحبها او يبقى وراهم شىء معين لازم يعملوه و هم كارهين له بتفرح طول ما الوقت بيعدى . بتفرح ان الوقت بيعدى
لأن ده معناه ان الحاجه اللى بيعملوها و هم كارهين بتقرب تخلص 



فاهمين قصدى؟



يعنى هدفى فى النهايه انى اقول اننا ممكن نفرح رده و احنا بنعمل حاجه مش بنحبها و نضيفها لسجل أنجازاتنا
المشكله مش فى الحاجه قد ما المشكله ازاى هنفكر فيها 
يعنى عقلك انت هياخد الموضوع من اى زاويه؟

Friday, November 26, 2010

الانجاز فى حياه المرأه الأم 4

عايزه أقول ان الأحساس بالأنجاز عامل زى اليويو
شويه فوق و شويه تحت
و هكذا كل حياه الأنسان ليست على وتيره واحده طول الوقت 
المهم البنى ادم يفضل مستمر و يعرف ان ده وقت و بيعدى فيحاول يعمل فيه احسن اللى يقدر عليه
و سبحان الله : "أنا خلقنا الأنسان فى كبد" يعنى تعب و مشقه . و الراحه الأبديه فى جنات النعيم . يا رب أوعدنا جميعا مع المصطفى صلوات الله عليه و سلامه




الانجاز مش بيقى بس فى الحاجات اللى بتحبيها
وزى ما قلت قبل كده ممكن تبقى عندك مسئوليات لازم تعمليها بس انتى مش حباها و بالأحتساب بتبقى افضل و بتتقلب لأنجاز

لكن لو هى مش مسئوليات و لا ضروريات و لا حاجه مفروضه عليكى بالعكس هى بأختيارك
هل يا ترى هتحسى فيها بالأنجاز؟ و هتعمليها أصلا و لا هتقولى انا ايه اللى يجبرنى على كده؟؟؟؟؟

يا ريت تشاركونى بأرائكم و تجاربكم 

أحبكم فى الله

الانجاز فى حياه المرأه الأم 3

كتير من الأمهات المتفرغات و انا منهم بيقولوا : "أنجازى فى حياتى هو انى اشوف زوجى و اولادى 
فى احسن حال"
يعنى انا بنجز من خلالهم 



محتاجه أتناقش معاكم فى المقوله ديه
لأنى قعدت فتره أقولها و كنت مقتنعه بيها و عدت فتره بعديها لقيت انه لأ مينفعش و سيطرت على فكره : طيب مع اولادى اللى شغلين وقتى و حياتى دول مسيرهم يكبروا و مش هيبقوا محتجنى زى دلوقتى . ساعتها انا هعمل ايه فى كم الوقت اللى هيبقى عندى و بعد ما بعدت عن اى عمل كان ممكن اخد فى خبره و بعد ما بقى اى خريج افضل منى الف مره يعنى حتى مش هعرف اشتغل تانى

بصراحه أكتئبي جدا و الدنيا بقت سوده فى عنيه و المستقبل مظلم 
و أقعدت أفكر جديا انى انزل اشتغل 

بس مقدرتش

مش علشان انا مش عارفه اشتغل و لا خايفه من التعامل الناس أجتماعيا او اى شىء من ده لا ابدا
لكن أحساسى بمسؤليتى ناحيه بنتى و بيتى كانوا بيقضوا على مضجعى
يعنى مينفعش البنت ترجع من مدرستها تروح على حضانه تقعد فيها لحد الساعه 6 او 7 عقبال ما أرجع من الشغل !!!!

طيب هلحق اقعد معاها أد ايه و هربيها امته و اعلمها القيم و المبادىء أمته و هى كل وقتها مقضياه بره البيت و انا كذلك
فضلا عن ضغط الوقت اللى هعانى منه و اللى مش هيخلينى حتى اعرف اعملها حاجه تأكلها بنفس 

مكنتش و مازلت قادره اعمل كده ابدا

لكن ده محلش المشكله !!!!!!
قررت ان لازم يكون فى حياتى حاجه تانيه بجانب بيتى و بنتى و تكون مفيده و تحقق أهدافى فى حياتى
و الحمد لله منتدانا الجميل ده يعتبر من اكتر الحاجات اللى أشبعت الأحساس ده جوايا و الى الأن بحاول أوجد مجالات أعمل فيها بما لا يتعارض مع مسئولياتى نحو حياتى الأسريه و فى نفس الوقت يشبع فضولى الشخصى و يحسسنى بالأنجاز

و يا رب ألاقى الحاجه ديه و انتم كمان

الانجاز فى حياه المرأه الأم 2

كتير مننا كأم متفرغه بيحس ان الوقت اللى بيبذله فى البيت من تنظيف و طبيخ و خلافه + الوقت اللى بيرعى فيه أطفاله عائق لنجاحه 
و بيحس ان حياته ووقته و ايامه بتضيع و تتسرب من بين ايديه
و تبقى خايفه و بعدين العمر بيجرى و انا مبعملش حاجه لنفسى كله ليهم
و بتدخل فى دور من الأحباط و النقمه على كل الحاجات اللى بتضيعلها وقتها و سرقه منها عمرها و بالتالى عصبيتها بتزيد ونفسيتها بتتعب
لأنها حاسه انها مهدره و مفيش حد حاسس بيها

الحقيقه انا مريت بالفتره ديه و كانت عصيبه .. كنت طول الوقت عابسه .. نادر لما أبتسم .. حاسه انى بضيع .. ال فى سنى بقى و ممكن بمؤهل أقل بقى ليدرز و بيقبضوا الشىء الفلانى و انا محلك سر

تعبت اوى اوى و كنت بدور على مخرج
لحد ما ربنا هدانى للى انتى بتقولى عليه يا ام حبيبه و اللى ذكرته جورى فى معرض كلامها و هو:


الأحتساب لوجه الله تعالى
لما تعملى حاجه كويسه لبيتك او اولادك مهما كانت الحاجه ديه تقيله على قلبك زى غسيل المواعين مثلا هههههههه
بتخف خالص لو انتى واخده نيه قبلها و لو انتى احتسبتى قبلها

يعنى ساعات مثلا ببقى تعبانه و مشغوله و ميعاد التمرين بتاع بنتى جيه و باباها مش موجود يعنى انا اللى هنزل اوصلها و همشى و هركب مواصلات ببقى متضايقه و حاسه انه لود على و تضيع لوقتى . بس لما بحتسب ده عند ربنا الموضوع بيختلف تماما و ببقى حاسه انى مش بضيع وقتى بالعكس انا عماله أخد حسنات بفضل الله

الموضوع بيعتمد بشكل كبير على اهداف الواحده مننا فى الحياه
يعنى ايه هدفك ؟

لو انتى هدفك العام انك ترضى ربنا و تسيبى أثر فى الدنيا يشهدلك يوم القيامه و يبقى فى ميزان حسناتك مش هيفرق معاكى بقى بتشتغلى جوه و لا بره
بتعملى خير فى مين
او بتعملى ايه علشان تاخدى الثواب
انتى هىبقى كل اللى همك ازاى تحاولى تصرفى وقتك فى اعمال تديكى ثواب اكتر
يعنى تفضلى بين خيرين و تختارى خيرهما ثوابا

يا ريت يا كا ام حيرانه و ضايعه زى ما انا كنت و فاكره ان عمرها بيهدر على الفاضى تتعلم الأحتساب و أخد النيه و تبقى على يقين من ده ساعتها بس هتحسى انك أنجزتى كونك أم و ربه أسره
هتحسى و انتى واقفه بتغسلى المواعين أنك أنجزتى ههههههه

هتحسى و انتى بتتعبى حتى فى تنضيف البيت او عمل اكل او كوى ملابس او غسيلها انك أنجزتى شىء فى يومك 
مش هتحسى ان حياتك مهدرة و ملهاش قيمه و مش هتفرق معاكى كتير حد هيشكرك على اللى بتعمليه او لأ 
لأنك هتبقى سعيده من جوه ان ربنا معاكى و شيفك و بيجازيكى خير على تعبك ان شاء الله

Wednesday, November 24, 2010

بنتى و أول دورة شهريه لها !!!!


هانتكلم النهاردة عن موضوع شائك شوية 

وهو اول دورة شهرية لبنتك

طبعا دة هاجس عند كل الامهات اللى بناتهم قربوا من سن البلوغ 


واسئلة كتييير بتدور فى راس كل ام 


اقول لبنتى والا لا ؟؟؟
لو قلتلها اقولها عند سن كام ؟؟؟؟
ازاى امهد لها الموضوع ؟؟؟
هاقولها ازاى اصلا ؟؟؟؟


==============================

اولا انا بنتى عندها 9 سنين و نصف
و اللى خلانى افتح الموضوع ده معاها دلوقتى حاجتين:
انها ممكن تلاحظ انى مش بصلى فى ايام معينه او متثاقله عن الصلاه و طبعا ده كان هيبقى تربويا وحش اوى ازاى عماله اقولها صلى و انا مش بصلى . و كنت ساعات اعمل نفسى بصلى و خلاص لكن كنت زهقت الحقيقه و انا عماله ادارى كأنى عامله عامله 


السبب التانى انى خفت حد من صاحبتها يقولها حاجه كده و لا كده لأى سبب و تبقى اولى المعلومات مسمعتهاش منى



فقلت مبدهاش بقى .. توكلت على الله "أستعنا على الشقى بالله"

فى مره مكنتش صليت قالتلى يا ماما مش هتقومى تصلى ؟؟ قلتلها : لأ 
أتفاجأت طبعا أزاى لأ كده حرام. قلتلها : لأ مش حرام تعالى اقولك ليه


و جبتها جنبى فى حضنى على السرير بتاعها و قعدت احكيلها الحكايه من الأول و هى:



ربنا سبحانه و تعالى خالق جسمنا بيقدر يعيش فيه النونو و يتغذى و يكبر منه .. كل فتره الجسم بيجهز نفسه علشان لو نونو جه يلاقى الأكل و الشرب و الحمايه .. و يقعد مستنى

لكن يكتشف ان مفيش نونو و لا حاجه
طيب هيعمل ايه فى الحاجات اللى جهزها ديه؟؟ كده هتبوظ. فيظطر انه يتخلص منها . فبيطلعها بره الجسم
زى بالظبط الجرح لما يطلع الدم و الميكروبات بره الجسم


فى الفتره اللى الجسم بيطلع فيها الحاجات ديه بره ربنا قالنا منصليش و لا نصوم كمان



طبعا بعد كده كان فى اسئله سيان فى ساعتها او بعدها زى مثلا:

كل اد ايه بيحصل كده؟
بيطلع الحاجات ديه منين؟
طيب شكلها ايه؟
طيب فى رمضان تصومى و لا لأ؟
طيب هتقضى الصلاه اللى عليكى و لا لأ؟
طيب هتقعدى كام يوم متصليش؟
طيب انا كمان هيحصلى كده؟ ايوه طبعا حبيبتى و ساعتها تبقى بنوتى الحلوه الجميله كبرت و تبقى مكلفه شرعا


مثلا انى لازم اغتسل علشان اعرف اصلى و ايه هو الأغتسال

و هكذا

الأنجاز فى حياة المراه الأم

السلام عليكم ورحمه الله و بركاته

عزيزتى المرأه .. أنتى أم؟

يا أهلا و سهلا و مرحبا 
تعالى وسط أخواتك و أحكيلنا و طلعى اللى فى قلبك عن مستوى أنجازك فى حياتك 

========================

الانجاز فى حياة اى بنى ادم خلقه ربنا شىء أساسى لسعادته فى حياته و أحساسه بنفسه.

الانجاز بيبقى فى حاجات بنحبها و ساعات مش بنحبها بس لازم نعملها, علشان ديه مسئوليتنا, علىشان ده الأصلح لينا, علشان أتكيف مع ظروف الحياه المختلفه, .....


الانجاز بيكون بالكم او بالكيف و حسب طبيعه العمل المنجز(بضم الميم و فتح الجيم)


الانجاز بيخلى طعم حياه اى انسان مختلف .. بيضفى عليه شعور من السكينه و الأطمئنان ممزوج بالثقه و مطعم بأبتسامه هادئه على محياه

الانجاز بيخليك راضى عن نفسك و عن اللى حواليك 

الانجاز بيخليك أهدى و بالتالى بتشوف الحياه على حقيقتها و تقيم الأمور بعقل متفتح و قلب مطمئن و روح هادئه متزنه


الانجاز بيطلع كتير من عقدك الداخليه بيخليك أقوى . بيشيل من عندك اى حساسيه و بيديك ثقه فى نفسك تقدر تواجه بيها المحيط الخارجى و انت مش حاسس بالنقص

الانجاز بيملى نفسك من جوه 

الانجاز بيملى عقلك و يبعده عن التفاهات و سفاسف الأمور

الانجاز بيملى وقتك و يمنعك انك تكون فريسه للمل و الضياع

الانجاز بيغير حياتك للأفضل

الانجاز بيضيف ليك و للى حواليك

الانجاز بيطلع احسن ما عندك و بيظهر فيك حقيقتك الجميله 

الانجاز بيلون حياتك 

الانجاز بيملى العالم بالخير .. بشرط انه يكون أنجاز فى حاجه خير  

========================

بس كلمه أنجاز بتختلف من شخص لأخر
شوفت ناس بتعمل حاجات كتير و تشقى و تتعب بس مش حاسه انها بتنجز !!
و شوفت ناس تانيه بتعمل اقل القليل و بتقول ياه تعبت انجزت كتير !!!!

ساعات الواحد بيفضل يشقى و يتعب فى بيته فى تنظيف و ترتيب و مطبخ و و و 
و فى اخر اليوم لما بقعد مع نفسى مبحسش انى انجزت 
أو أحسن ان مستوى أنجازى النهارده كان متدنى مع انى كنت بشتغل طول اليوم 

طيب ليه فى ستات أمهات فاضلات و بتكون مرأه عامله و حياتها عامره و يومها مشحون للغايه و مع ذلك فى اخر يومها مش بتكون راضيه عن ما حققته ؟؟!!!!


يا ترى الأحساس بالأنجاز بيجى بأيه ؟
بكتر الشغل؟
بنوعية الشغل؟
بكون الشغل بره البيت او جوه البيت؟


الأنجاز او بمعنى أدق الشعور بالأنجاز سر محتاج كل واحده فينا تكتشفه جوه نفسها علشان تبقى أفضل
تعالوا مع بعض نحاول فك طلاسمه 

Monday, November 22, 2010

مشكله واجهتنى وطريقتى فى حلها - يا ترى ايه رأيكم

تمهيد لابد منه
:)


انا بنتى وحيده و اول حفيده فى العائلتين و مفيش جنبى جيران و لا قرايب عندهم اطفال و مبنخرجش كتير و لا بنشوف ناس غير قليل جدا
يعنى كان كل اللى بيتعامل معاها تقريبا كبار و تعاملها مع الأطفال الصغيرين كان فى حدود ضيقه جدا و سريعه
فهى واخده على المعامله المتفهمه المراعيه الراقيه اللى الكبار بيتعملوا بيها معاها
فكانت شايفه الدنيا بمبى بمبى بمبى و فاكره كل الناس ملايكه و بيحبوا بعض 
و كانت عندها براءه كده و مشاعر فياضه من الحب و العطاء الى حد السفه هههههههه

اول ما دخلت المدرسه مكنتش بتروح فى كى جى 1 غير قليل جدا علشان كانت بتعيا علطول لما تخرج من البيت
و مدخلتش كى جى 2 نطت على برى1 علطول

المشكله:
فى برى 1 كان الحال ماشى الكلاس اغلبه بنات صغيره و لذاذ و فى اقليه مؤذيه حصلت مناوشات و مضايقات من الحين للحين بس مكنتش كبير
فى برى2 بقى ظهر لها العالم الحقيقى و كشر عن انيابه 
كانت مشكله كبيره قلبت حياتى و حياتها كنت بقعد اعيط عليها و على اللى بيتعامل فيها من الأطفال اللى زيها
مش واخده هى على ان حد يغيظها او يدايقها او يكرهها او ياخد حقها او مجموعه عيال يتفقوا عليها و يتريقوا عليها و كتييييير اوى من ده

بدأت تنطوى ده غير احساسها بأنها غير مقبوله و احساسها بضعفها و قله حيلتها و كرهها للدنيا كلها
كانت بتقعد تعيط فجأه لوحدها بدون سبب

يا حبيبتى يا بنتى فكرتونى بحاجات وحشه كنت عاوزه انساها 

و انا التانيه كنت هبله و قليله الحيله و مش بساعدها صح و ساعات اقعد اعيط معاها 
و اللى زاد و غطى الميس اللى كانت اغلب الوقت فى الكلاس معاهم كانت ست قويه و مفتريه و بتعتبرها مدلعه عايزه عيال تاكل الظلط و معاها شويه عيال عايزين يتولع فيهم بجاز
كانت سنه بشعه اعوذ بالله يا رب ما يعيدها تانى
أتأثرت فيها البنت نفسيا بشده و شافت العالم بنظاره سودا و مهببه بطين و كانت حزينه

المهم مرت السنه بكل ما فيها و فى الأجاره ربنا سبحانه و تعالى بفضله هدانى لكتاب بيتكلم عن المشكله ديه عند الأطفال . بيركز بشكل أساسى على كيفيه تعامل طفلك مع اطفال بيسيئوا اليه و يتطهدوه . كتاب مترجم 
بس بعد عون الله فدنى جدا و بدأت أطبق اللى فيه مع بنتى طول الأجازه و جهزتها نفسيا بكل ما املك علشان تستعد للحرب اللى هتاخضها فى برى3

و الحمد لله أثمر التجهيز عن نتائج رائعه
بل ساعات كانت الأيه بتنقلب و اروح اجيبها من المدرسه الاقى العيال طالعين يجروا على يقلولى ألحقينا يا تانت .... هتموتنا هههههههههههه

عملت معاها ايه فى الصيف و ايه التكنيك اللى اتبعناه . ده اللى هقولكم عليه فى المشاركه القادمه بأذن الله فأنتظرونى
==============================================

زى ما قلت فى صيف برى2 أبتدينا المشوار نحو التغيير 
أشتغلت على كذا محور الحقيقه:

أولهم نفسى لأنى كنت خايبه و بنتى كانت بتشوف ده . بتشوف جبنى و قلة حيلتى و انا مش قادره اساعدها علشان مش عايزه اتخانق مع حد 
فقلت وقفه بقى مع نفسى. انا عايزه بنتى تطلع كده؟ لا و الف لااااااا. يبقى لازم بقى ادوس على نفسى فى النقطه ديه و اتغير و هقولكم مواقف حصلت ورتلها فيها التغير ده
كان زمان مثلا لو رحت المدرسه لقيت حد من الولاد عملها حاجه بسكت . دلوقتى مبقتش اسكت روحت مره اخدها لقيت بنت عضاها الدم ضرب فى نافوخى لكن للأسف لسانى بيتعقد و مبعرفش اتكلم. جيت على نفسى ورحت سحباها من ايديها ودخلت على المديره و انا بزعق. صحيح كان قلبى فى رجلى بس حاولت ميبنش ده على
و دورت كمان على ام البنت و اتخنقت معاها طبعا بأدب و بألفاظ محترمه لكن بعصبيه لأن كده كتير فعلا.
و فضلت ادور على مامة البنت من دور لدور و فى الشارع كمان لحد ما بنتى زهقت و قلتلى خلاص يا ماما مش مهم قلتلها لأ ده حقك و لازم تاخديه

المحور التانى: هى و جاء التغير بكذا طريقه : بالكلام. بأيات القرأن الكريم و المؤمن القوى خير و احب الى الله من المؤمن الضعيف. ببث ثقتها فى نفسها و تصحيح مفاهيم عندها زى مثلا: مش معنى ان حد قالى مثلا ان شنطتك و حشه انها وحشه ده رأيه هو . انتى و انتى بتشتريها مش كانت عجباكى وشايفاها حلوه خلاص اهتم برأى حد شايفاه وحشه و أتأثر بيه ليه ديه مشكلته هو مش مشكلتى.
مثال اخر لو حد قالى انتى بايخه مثلا أتأثر ليه و اعيط على كلامه مادام باقى اصحابى بيحبونى و شيفينى لذيذه و مش بايخه
يعنى حاولت اعلمها تهتم بكلام مين و تطلع كلام مين من دماغها
حتى لو كان الحد ده هو الميس شخصيا . ديه كلها اراء لا تعنى انها حقيقيه
الا لو ماما و بابا او الناس اللى بيحبونى قالولى على رأى معين ساعتها اهتم
لكن حد عاوز يديقنى او يغيظنى او بيكرهنى ده كلامه مش مهم عندى
و لو قالى كلمه لا هتزيد و لا هتنقص منى

من اكتر الأساليب اللى اثرت جدا و جابت نتائج ناجعه بأذن الله تعالى هى التمثيل أينعم التمثيل
كنا بنقعد نمثل سوا . أنا مثلا البنت الوحشه وبقولها تعليق بايخ مثلا او كلام رذل وهى ترد على و بعدين اقعد اتناقش معاها فى ردها و اقولها طيب شوفى انا لو فى مكانك هقول ايه يلا و نعكس الدور هى البنت الوحشه و قالتلى نفس التعليق البايخ أوم انا قايله رد مفحم
مثال:
انا بنت بايخه و بقولها: شنطتك شكلها وحش اوى
هى: تسكت بحزن لأ مش موحشه

العكس هى: شنطتك شكلها وحش اوى
انا: -بأبتسامه بالعكس انا شايفاها حلوه اوى ده ذوقى و انا بحبه
او - و انتى شنطتك حلوه اوى بأبتسامه عريضه

و نقوم نقلب الأدوار تانى و ترد هى الرد اللى انا علمتهولها او اقترحته عليها سيناريو اخر: هى لمجموعه من البنات: بترقب ممكن العب معاكم انا (مجموعه البنات ) : لأ

العكس: انا : ها يا جماعه هنلعب ايه النهارده بأبتسامه

فاهمين قصدى يا بنات يعنى بحاول اعلمها ازاى ترد فى حاله حد اساء اليها
و ازاى اصلا تندمج مع الأخرين و تعرض نفسها عليهم بشكل سلس ميخليش حد يرفضها

و سيناريوهات زى كده كتييير كنت بسيبها تخترع سيناريو و نمثله سوى و ساعات بتمثل هى دور المظلومه خالص و انا الشريره اللى بأذيها لدرجه انها مره صعبت عليها نفسها اوى و قعدت تعيط كتير
بس انا شايفه ان ده صحى لأنها شافت نفسها بتبقى عامله ازاى و هى ضعيفه ورفضت ده من جوه و بالتالى استجابت للتغير
و ساعات برده انا اللى كنت بخترع السيناريوهات

ممكن كل يوم نمثلنا سيناريو او اتنين حتى لو نكررهم مفيش مشكله و كنت ساعات افاجأها بردود غير السابقه و اشوف هتعمل ايه و اقترح عليها و هكذا

صدقونى الطريقه ديه هايله جدا جدا جدا و مؤثره بفضل الله برده كنت بفهمها انها لازم لو حد ظلمها و تهامها بحاجه غلط تدافع عن نفسها بمنتهى الذوق و الأدب و توضح اللى حصل من وجهة نظرها متفضلش واقفه ساكته متأثره باللى بيتقال عليها و حقها يضيع و برده كنا بنمثلها فى نفس الأثناء و دتها تتعلم كاراتيه رياضه كويسه تعلمها الثقه بالنفس و انها عندها من المهارات ما يمكنها من الدفاع عن نفسها او انها تحس بنفسها و بجسمها و قوتها و الأمكانيات اللى ممكن تعملها بيه و كان الكابتن بيعلمهم ان الكاراتيه للدفاع عن النفس مش الأفتراء على خلق الله و لو حد حاول يجى ناحيتك ازاى تقدر تحمى نفسك و تصده عن أذيتك

خطوه كمان انى نقلتها من فصل المشاغبين اللى كانت فيه و كانت لى وجهة نظر فى الموضوع ده: - مش عايزاها تدخل على الناس القدام اللى اذوها و تبقى اولى مواقفها معاهم ممكن يهدولى كل اللى عملته فى الأجازه .
- عايزاها تاخد فرصتها مع ناس لسه جديده متعرفهاش تدخل عليهم بشخصيتها الجديده . تاخد ثقه و بعدها تقدر تواجه اى حد 

و الحمد لله ربنا ييسرلى الأمور و كانت سنه موقفه وزى ما قلتلكم كانوا ساعات الولاد بيستغيثوا منها لأن اللى كان يفكر يلمسها بتعمله ارهاب هههههههه

ساعات قليله كان بيبقى فيه تجاوزات و تبقى هى افترت على حد و ده كان من وجهة نظرى شعور ضرورى وصحى هى اختبرت قوتها و عرفت انها ممكن تأذى حد (بتكلم عن نفسيا اكتر منها جسمانيا) و هنا يجى دور التوجيه بقى و زرع فكره تقوى الله فى نفسها و انها لازم تبقى عادله مع الناس و تراعى الله حتى لو محدش غيرها عارف
و اعتقد ان فى الحاله ديه التوجيه ده هيبقى مؤثر لأنها بقت قادره فلما تمنع نفسها امتثالا لأوامر الله هى كده هيزداد احترامها لنفسها
فى الحاله ديه تقدر تسامح و تعفو و تسيب حقها بمزاجها او تاخده لو عايزه فضلا عن عدم الأعتداء على حد
غير لما يبقى الطفل نفسه ضعيف و مش قادر ياخد حقه و اقوله اعفو و سامح . يسامح ايه هو مش بمزاجه اصلا ده مجبر على كده و بيدارى وراء خلق التسامح

أممممم. ايه تانى ؟؟؟؟؟ تقريبا هو ده كل الموضوع و كل اللى فاكراه دلوقتى . ولو افتكرت حاجه تانى هبقى اضيفها ان شاء الله

كيف سيتذكرك اولادك بعد مماتك؟؟


بسم الله الرحمن الرحيم 
اللهم احيينى ما دامت الحياة خيرا لى وامتنى ما دام الموت خيرا لى 
كلنا هنموت .. لا مفر
و مش هيبقى مننا غير صورتنا فى عيون اللى أثرنا فيهم و عيشنا معاهم

*********************

ياترى يا بنتى هتفتكرينى ازاى بعد ما اموت
؟؟؟
هتفتكرينى و انا مكشرة و متنرفزه و بزعق..

هتفتكرينى وانا بضحك معاكى من القلب و بلعب معاكى
و لا هتفتكرينى و انا بزعق على البيت اللى اتبهدل و اللعب اللى ملأت المكان ..
ياترى انا كنت بلعب معاكى اصلا؟؟ كام مره؟؟

*********************

هتقولى ياه الله يرحمها بس كانت عصبيه اوى..
و لا هتقولى اللى يرحمك يا امى كنتى الحضن اللى بتحامى فيه..
هتقولى ماما كانت حنينه اوى..
و لا يوم من ايام ماما

و لا مش هتقولى حاجه خالص؟؟؟؟

*********************
لما يذكر اسمى قدامك .. صورتى فى خيالك هيبقى شكلها ايه؟

يا ترى هتبقى وجه بشوش و ابتسامه صافيه ونظره كلها حب ..
و لا مبهدله و مكشره و بصوت و ازعق..
و لا مفيش حاجه خالص؟؟؟؟

*********************

يا ترى هتشوفينى ازاى ؟؟
دفعتك للأحسن .. كنت معين ليكى على الدنيا ..
و لا
كنت ضدك . ضد احلامك و افراحك
كنت ام جهله و لا متعلمه..
كنت ام قويه و مفتريه و لا حنينه..
كنت صحبتك اللى بتحبيها و لا اللى بتتجنبى الكلام معاها..
كنت على مستوى احلامك و توقعاتك كأم و لا خيبت ظنك فى؟..
كنت الأم اللى تفتخرى بيها و تتباهى بيها و لا اللى تخافى تمشى معاها؟..
كنت الأم اللى على مستوى الحدث و لا التايهه الغرقانه فى توافه الأمور..
كنت الأم اللى اول ما تتعرضى لمشكله تلجأى ليها وتلاقيها جنبك و فى ضهرك و لا اللى مش حاسه بيكى و لا فضيالك..

؟؟؟؟؟؟؟؟

*********************

يا ترى هتفضلى فكرانى اد ايه؟
شهر اتنين و لا تأثيرى هيمتد بعمرك و عمر اولادك .. أحفادى
يا ترى هتحكى عنى لأولادك؟

هتقوليلهم عنى ايه
هتعلميهم حاجه علمتهالك و لا هتشوفى انى معلمتكيش حاجه تستاهل ؟؟؟

*********************

يا ترى هتقولى ماما وحشتنى اوى ؟؟

*********************
يا ترى احنا جوه اولادنا شكلنا ايه؟؟؟؟

سيناريو يؤرقنى و يملأ تفكيرى من الحين للحين..
عندها انتبه و اسعى الى تحسين صورتى امام ابنتى..

يا ترى فى حد منكم السؤال ده تعبه زى ما تعبنى ؟؟؟

بنتى هتفتكرنى ازاى بعد ما اموت
؟؟؟؟؟؟؟؟؟؟؟؟



لكل الأمهات الشقيانين و التعبانين مع التعليم - مع خالص حبى




أهلا يا كل الأمهات
و خصوصا أمهات الكى جى
و خصوصا أكتر أكتر أمهات كى جى وان
لكل الأمهات التعبانين الشقيانين الفاقدين الأمل .اللى العلاقه بينهم و بين اولادهم ساءت من ساعه ما المدرسه بدأت .
اللى شايفين و لادهم على انهم مش فاهمين و لا فى دماغهم اى حاجه و ساعات اغبيه او ضعيفى التركيز او مستواهم الدراسى وحش .....
لكل دول أقولهم

أستهدوا بالله .. أنتم بتتكلموا عن اطفال فى كى جى وان و بقالهم أسبوعين فقط فى الدراسه


أستهدوا بالله يا امهات و خليكوا ريلاكس خالص انتم مش فى حرب
أستهدوا بالله و أطمئنوا بالله و توكلوا على الله و أسألوا الله التوفيق و الوسيله و لن يضيعم الله أبدا لا انتم و لا اولادكم


ها خلاص هديتوا .. خدوا نفس طووووويل بقى

و خدوا نيه

أيوه خدوا نيه بأن كل مجهود بتبذلوه مع اولادكم هيكون لله و أخلصوا النيه فى ذلك
هيكون لله أزاى يعنى: هيكون لله بأنك عايزه تربى فرد صالح فى المجتمع يكون مصدر رفعه و عزه لأمته
فرد على ايده نهضة بلده و أمته و عزتها ترجع بأذن الله
بعلمه ليه؟ علشان العلم هو السبيل الأهم مع الأخلاق و الدين لتحقيق النهضه و أسترجاع العزه و الكرامه و فى النهايه تحصيل رضى الله و دخول الفردوس الأعلى بأذن الله
و تحقيق مراد الله فى ارضه و هو اعمارها و عبادته سبحانه و تعالى على الوجه الصحيح الذى يدركه و يشعر به العالم قبل غيره

ايه الكلام الكبير ده؟ ليه كل ده؟ ديه مذاكره يعنى ..
لأ هو مش كلام كبير و لا حاجه . هو كلام حقيقى وواقع. كل أم فينا لازم تستيقنه و تعرف ان ديه مهمتها الأساسيه فى الفتره الحرجه اللى بتمر بيها أمتنا
و ان احنا مش بنربى ولد او بنت علشان يجيب مجموع كذا او يدخل الكليه الفلانيه او علشان افرح بيه و بشهادته و يلاقى شغلانه يصرف بيها على نفسه او علشان يبقى فى وضع اجتماعى معين
لأ أحنا مش بنربى علشان كده . ديه مش أهداف .. ديه كلها نتائج

أمال ايه الأهداف؟؟

الهدف اننا عايزين نربى فرد صالح قوى متميز و علشان الفرد ده يتربى بالشكل ده محتاج لمنظومه متكامله من رعايه صحيه و نفسيه و تربويه و طبعا علميه
يعنى من الأخر عايزه اقول ان التعليم جزء و ليس كل من منظومة بناء الفرد
فمينفعش نركز فى جزء واحد بس و نخليه يطغى على باقى الأجزاء. المنتج مش هيبقى الفرد المتوازن الكفىء اللى عاوزين نوصله

ليه بقول كل الكلام ده؟؟

بقوله لكذا سبب .
اولا: نحط كل حاجه فى حجمها الطبيعى
ثانيا: ننظر للأمور بنظرة اعم و اشمل
ثالثا: علشان نبقى متوازنين فى اتخاذ قررارتنا بشأن كل ما يخص أبنائنا
رابعا: وديه نقطه مهمه علشان تقدرى طفلك و تحترميه و تعرفى انه لو مش جايب فى الجزء ده 100 فى الميه هو لسه عنده اجزاء كتيييرة يقدر يبقى فيها متميز
و بالتالى متقهريهوش و لا تشعريه بضألته او انه اقل من الأخرين او حتى انه اقل من مستوى توقعاتك
لازم يبقى اولادنا على يقين تااااام بأننا بنحبهم بغض النظر عن مستواهم الدراسى او غيره
و النقطه ديه بالغه الأهميه بالنسبه للطفل و هى اللى ممكن تخليه يركب صاروخ للفضاء و يحقق المعجزات او تنزل بيه لسابع ارض
أيمانك بيه و بقدراته و احترامها و احترام مهاراته ومواهبه اللى ربنا اودعها فيه مهم و أساسى علشان يطلع أنسان متوازن واثق من نفسه وقدراته وبالتالى قادر على مواجهة الحياه و أجتياز المحن و الصعوبات التى لا مفر منها فى سبيل تحقيق ما يصبو اليه
.. أنا عارفه و مدركه أن كل الأمهات اللى هنا عارفه الكلام ده و احسن منه كمان أنا بس حبيت أفكركم و أذكركم ..

طيب بعد ما أفتكرنا الحمد لله و أستقرينا
نيجى بقى لجزئية المذاكره ديه و نتكلم عنها بالتفصيل شويتين تلاته.

لازم أحط لنفسى خطوط أساسيه و أهداف أمشى على نورها بخصوص موضوع التعليم
أنا عاوزه ابنى يتعلم لغه و حساب وقرأن و علوم و .... و يبقى شاطر و ......
لأ برده ديه مش اهداف ديه نتائج

أمال ايه الأهداف؟؟

اولا: انا عايزه ابنى يحب العلم فى حد ذاته و يسعى اليه
ثانيا: يعرف ان التعلم ده جزء من الحياه زيه زى الأكل و الشرب مستمر و لا غنى عنه
ثالثا: التعلم ملوش وقت يعنى مش بس فى شهور الدراسه
رابعا: يعرف ان التعلم ده شىء ممتع و لذيذ ينمى العقل و الشخصيه و يشعر بده فى حياته
خامسا: هو لازم يعرف هو بيتعلم ليه ؟؟ و علشان ايه؟؟ ليه بيطلب منه كتابه هذا او حفظ ذاك و لا زم يبقى مقتنع و مشارك معاكى فى رؤيتك و أهدافك
سادسا: لازم هو يبقى راغب فى التعلم و محب للعلم من نفسه
علشان الأهداف ديه تتحقق يبقى لازم نحبب الطفل فى المدرسه و ديه يبتدى من الأول من قبل ما يدخل المدرسه

طيب و بعدين حب المدرسه .. مش بعد هو ما يحب المدرسه نزهقه احنا منها بضغطنا عليه و اللى اكيد اكيد لن يأتى بنتائج ايجابيه و لو أتى هيبقى مؤقت
و الضغط عليه و نهره وزجره هيسوء العلاقه بينك و بينه و بالتالى مش هيسمع كلامك و هيحس انك مش بتحبيه و ده شىء هيزعله جدا و يتعبه لأن احساسه بحب والديه اساسى لنموه بشكل سليم
أذا نخلص من كده ان الأسلوب ده مرفوض تماما لأنه مضر و مش بيجيب نتيجه كويسه ومتهيألى كلنا جربنا النقطه ديه و أتأكدنا من صحته

طيب يبقى ايه الحل؟؟

علشان نضرب كذا عصفور من العصافير السته اللى فوق دول بحجر واحد أفضل طريقه هى التعلم عن طريق اللعب و المرح
هتخلى اولا و ثانيا و رابعا و سادسا تتحقق بضربه واحده
هتعملى ده ازاى من ابنك اللى فى كى جى؟؟
هتعمليه بأنك هتغنى معاه مثلا اغنيه الحروف .. هتجبيله بازل على شكل حروف.. هتجيبى لوحات كبيره فيها حروف أرقام أجزاء من جسم الأنسان و تعلقيها فى غرفته
هتجبيله برامج كمبيوتر تعليميه لها طابع المرح هيتعلم منها شكل الحرف و نطقه و كلمات عليه هيتعلم منها ارقام كلمات .....
مش هضغط عليه فى موضوع الكتابه ده بالذات للسن الصغير و هسيبه براحته خالص فيها ممكن يلون يعمل تريسينج على اد ما يقدر لكن انه يكتب الحرف كاملا مظبوط و لوحده أنا شايفه ان ده ارهاق جدا ليه و شىء غير مجدى و بيضيع عليه وقت كتير كان ممكن يستفيد بيه فى حاجات افيد هو قادر على تعلمها و مناسبه
لسنه بدل من تضيع الوقت فى محاوله جعله يعمل شىء هو لسه غير مؤهل ليه جسمانيا او نفسيا.
و الأهم من ده كله انك تكونى ام هاديه و محبه و متفهمه و تشوفى الأمور من وجهة نظره علشان تقدرى تقنعيه و توجهيه صح.
مش معنى كده انى بقولك تسبيه منه لنفسه بدون اى توجيه استنادا لقولى متضغطيش عليه. لأ طبعا. كل واحده فينا عارفه ابنها او بنتها و تقدر تعرف هى مش بتعمل الحاجه الفلانيه ديه ليه. هل علشان هى مش قادره فعلا . حاولت و منفعش .. يبقى نصبر فتره و نحاول تانى .
او علشان هو بيدلع ساعتها الحزم يبان و يطلع من كثير من الحب و النصح و التحفيز بهدايا . بتصقيفه حلوه . بأكله حلوه ......
نقطه مهمه كمان
الطفل الصغير بيفهم و يحفظ بالتكرار و تكرار اكتر مما تتخيلوا و كل ما كرر أكتر كل ما بقى افضل
و أفتكروا كده الموقف اللى أكيد عدى على كل واحده فينا. ان ابنها او بنتها يسألها على حاجه و بعد ما تجاوب عليه ممكن يستنى شويه و يكرر سؤاله تانى و كأنه عاوز يسمع نفس الأجابه تانى
سبحان الله العلم أثبت ان كل معلومه الطفل بيعرفها بتنمى وصله معينه فى مخه . و كل ما المعلومه تتكرر الرابط يقوى أكتر

و ده يقلنا ليه الطفل محتاج لما يرجع البيت نعيد و نزيد معاها و ان التكرار اللى بيحصل فى المدرسه لوحده مش كفايه او بمعنى اصح غير مرضى لينا

بس للأسف أحنا لما بنلاقيه مش فاكر او مش حافظ بنتضايق و نتخنق و نشده من قفاه و نذنبه جنبينا على الكرسى و يللا قول كذا اكتب كذا و تفضلى تهاتى جنبيه و فى الأخر هتلاقيه فصل منك و زهق و مش عايز لا يعمل حاجه و لا حتى يسمع صوتك
كل ده علشان انتى بتتصرفى بالطريقه التقليديه و كأنه بنى ادم كبير هتقعديه على كرسى يذاكر و هو ميقدرش على القعاد كده بدون حركه و لا التركيز فى الحاجات الممله ديه لفتره طويله
يبقى الحل زى ما قلنا قبل كده برامج و اغانى و لعب كلها ظاهرها لعب و مرح و هو فى الحقيقه بيتعلم منها على افضل ما يكون و ده دورك انتى فى البيت اللى بتكملى بيه دور المدرسه


هتقولى المدرسه بتجرى و هو مش لاحق و الحاجات ديه .. هقولك روحى اتكلمى مع اداره المدرسه لو حابه و افهمى منهم غرضهم التربوى من وراء كده ايه

لكن اللى احب انا اقولهولك ان حتى البرامج اللى على الكمبيوتر و اللى بتعلم الأطفال الحروف مثلا بتستعرض الحروف كلها و ساعات وراء بعض مش بطلعله حرف و لما يبقى خلاص تمام تنقله على الحرف التانى لا ابدا

و هتشوفى لما تجيبى البرامج ديه هتلاقيه مستمتع اد ايه و مستواه بقى افضل و مع كتر التكرار هتلاقيه زى ما نفسك تشوفيه وبدون تعب و مجهود منك
و بجو كله لطف و مرح


 فى النهايه أحنا كده هنتفق على الأتى


 موضوع الكتابه ده بالنسبه لكى جى وان انسوه ارجوكم على الأقل دلوقتى كى جى اورال و بس و الدليل على كلامى ان مناهج الوزاره لكى جى كلها اورال و ممنوع اصلا يكتبوا فى فتره الكى جى كلها و ده الصح لكن نظرا لضغط اولياء الأمور على المدارس الخاصه بيكتبوا الولاد علشان يتقال عنهم انهم مدرسه 
كويسه و اولياء الأمور يرضوا عنها و الضحيه هو الطفل اللى هيلاقى نفسه فجأه مكلف بمهام هو مش قدها.
موضوع بقى انه يكتب بخط حلو فى كى جى تو مثلا برده انسوه الخط ده ممكن ميتظبطش الا على برى 3 و ساعات بعد كده
نشيل لفظ مذاكره و احنا بنتكلم مع كى جى قوليلها تعالى نلعب تعالى نلون نغنى تحبى تلعبى على الكمبيوتر
التشجيع و اظهار الفرح بأنجازاته الصغيره
علشان نحقق ثالثا اللى مذكوره فوق و اللى كانت بتقول "التعلم ملوش وقت يعنى مش بس فى شهور الدراسه" نجيبله البرامج ديه طول السنه و ممكن تبقى كلها بتتكلم عن نفس الموضوع بس بأشكال مختلفه . نوديه المكتبه و نجبله كتب من سنه . و يبقى هو ده اللعب بتاعنا . يعنى بدل ما يقعد على الكمبيوتر يلعب جيمز يلعب على البرامج ديه

 علشان نحقق خامسا و اللى كانت بتقول "هو لازم يعرف هو بيتعلم ليه ؟؟ و علشان ايه؟؟ ليه بيطلب منه كتابه هذا او حفظ ذاك و لا زم يبقى مقتنع و مشارك معاكى فى رؤيتك و أهدافك" لازم تكلميه فى اوقات متفرقه بلغه سهله و بسيطه عن اهميه العلم و حب الله و الرسول للى بيتعلم و الثواب الكبير اللى بياخده العلماء 
و تكلميه عن عالم مثلا بشكل مبسط و مسلى والصعوبات اللى واجهته و تغلب عليها ازاى
هيفهم انتى بتقولى ايه حتى لو مبنش عليه المهم تبقى لغتك سهله و شيقه فى هيئة سؤال و جواب او لو انت فى الموقف ده كنت عملت ايه و هكذا

قبل ما تستائى ان الطفل مثلا فى المدرسه بتاعته أخد كذا و فى مدارس تانيه أخدت أكتر
عايزاكى تقعدى مع نفسك و تفكرى. الحاجه اللى ابنك مأخدهاش ديه هتفرق معاه لأى مدى؟؟ يعنى على المدى القصير .. المتوسط .. و الطويل
مثال: لو بنتك فى كى جى تو مثلا و مأخدش فى مدرسته مثلا الفرق بين a, an وفى مدارس تانيه اخدتها. هتفرق النقطه ديه بالنسبه له بعد سنه ؟ طيب بعد 4 سنين مثلا؟؟ طيب بعد 10؟؟؟؟
لو بصيتى للأمور بالشكل ده هيبانلك علطول ايه اللى بستاهل تقلقى عليه و ايه اللى مش مشكله
أخيرا اتمنى يكون كلامى خفيف عليكم و أفاد اى ام جميله فيكم بأى شىء حتى لو كان بسيط


و يعلم الله ان كل كلمه كتبتها هنا هى من واقه تجربتى الشخصيه و قراءاتى فى الموضوع ده لأنى بحب الأطفال اوى و شايفه انهم الأمل اللى فاضل لينا و بتمنى لكل طفل من اولادنا انه يكون عالم كل فى مجاله ينفع بيه الله الأمه و يعز بيه الأسلام و المسلمين

أسفه رغيت كتير و طولت عليكم
و منتظره تعليقاتكم
مع خالص حبى